Kamukha Ko Si...

Ako ay nagbalik. Kaya eto medyo balik blog. Hindi ko lang alam kong adik ako, pero iba ang pakiramdam kung hindi man lang ako makapag-blog, o kahit na nga mabisita ang mga nasa listahan ng mga blogs ko. Para bang me kulang, though nakatulog naman ako.. so siguro hindi pa naman ako ganoon kaadik. Kasi kung adik na adik na talaga ako, baka hindi na ako makapagkatulog at kung makatulog man ay mapanaginipan ko na ang pagba-blog. Kung adik man ako, wala ring problema…

ADIK!!!

Kahapon, nasilip ko sa clinic ni dra. ang tungkol sa My Heritage face recognition thingy. Kung sino ang kamukha ko sa mundo ng showbiz. Sa mundo ng entertainment. Sa mundo ng palakasan. Mga kilalang taong ka-mukha ko. Kumbaga, isa lang ang hulmahan namin. Mapa lalaki o babae, walang pinipili. Basta:

Ka-mukha
Ka-ilong
Ka-mata
Ka-kulay
Ka-buhok
Ka-panga
Ka-labi
Ka-balat
Ka-tenga

Basta ‘yon na ‘yon.

Naging intresado tuloy ako. Kaya naman naghalungkat agad ako ng mga pinaka-huli kong larawan sa aking baul.

At nang makasumpong nga ng sa palagay ko ay maayos na larawan, ‘yon bang artistahin ang posing, though artistahin naman talaga ako.. he he he.., tipa ko agad address: www.myheritage.com.

Upload ko ang aking pichur.

At pagkatapos ng ilang minuto. Ilang minutong kunwari ay abala sa trabaho, ‘yon pala eh may nangyayaring paghahambing sa likuran, eto ang naging resulta. Mga resulta hindi ko alam kung bakit sila ang mga “ka-mukha” ko raw. Wala nga akong kilala dito sa mga kamukha kong ito eh.

Rani Mukherjee (68%) – an award winning Indian actress of Bollywood. Magaling daw ‘to sa iyakan at drama. Hindi ko pa rin ma-gets kung bakit kasama ito sa listahan ko.

J.M. Coetzee (63%) – a nobel prize winner for literature. Mukhang astig ‘to. siguro kasi mahilig sya sa literature, ako mahilig rin. Sya ang taga-sulat, ako ang taga-basa.

Giacomo Puccini (60%) – pangalan pa lang Italyanong-italyano na. Kumpositor ang isang ito sa mga opera house sa Italy. Mahilig sa musika. Mahilig tumugtog. Mahilig rin ako sa music, nagpupumilit umipit at kumaskas ng gitara, pero parang walang hilig ang gitara sa akin. Pakantahin mo nalang ako.

Riya Hayworth (59%) – eto and sikat na sex-symbol ng Hollywood noong dekada kwarenta. At ako naman ang sex symbol ng Jeddah.. he he he, bawal kumontra.

Roh Moo Hyun (55%) – politiko, pangulo ng South Korea - para tuloy gusto ko nang pumasok sa politika eh a.k.a. "public service".

Kim ki duk (58%)– Koreano pa rin, eto naman director ng pelikula. Kontrobersyal sa isyu ng “cruelty to animals” sa kanyang mga pelikula.

Albert Einstein (56%) – sigurado hindi kami magkakasundo nito sa Physics.

Magic Johnson (55%) – siguro parehas lang oily ang face namin sa pic kaya nag-match kami. Isa sa mga sikat na AIDS patient, well ako hindi naman sikat pero dito sa opis eh AIDS (As If Doing Something) patient rin ako.

Lu xun (55%) – Intsik. short story wrier ‘to. Di ko lang alam kung nakikita sa mukha ang pagiging manunulat. Kung hilig nya magsulat, sige basa nalang ako.

Allen Iverson (54%) – ang alam ko basketball player ‘to. hindi ko alam kung bakit sya kasama sa listahan ng mga kamukha ko, pero siguro ka-ilong(?).

Katahimikan

Connecting…

Connected.

Disconnected.

Connecting…

Connected.

Disconnected.

Paulit-ulit ngayong umaga. Tapos panay ang kaltas ng STC sa aking account at kung minsan naman ay nagbabalik naman ng sukli.

Ano kayang meron ngayong umaga?? Hanggang kay Lyzius palang ang nabibisita ko, eh napuputol na ang koneksyon ko. May balāt kaya sa pwet ‘tong si Lyzius? Ayaw ko nang pag-usapan yan.. he he he.

Connect ko ulit.

Connecting…

Connected.

Disconnected.

Wala talaga… hanggang sa…

Tiiittt..tiiittt!

Message.

Sender No.: 11186

Message:

Dear Customer: You have consumed your entire JawalNet Bundle.

Kaya naman pala eh! Kelangan ko na palang mag-renew ng aking subscription. Buti nalang at nakapagpa-attendance na ako. At sigurado sa araw na ito ay wala ako sa listahan ng maiingay kasi mananahimik muna ako ngayon hanggang mamayang hapon.

Hanggang sa muli mga bata… magpapakabait!

New 7 Wonders of the World Update

Mabilis lang 'to. 

Bumisita ako kani-kanina lang sa site ng new 7 wonders of the world.

At update lang para sa ating mga kabayan. Patuloy po ang pamamayagpag ng ating mga kandidato. Patuloy na pinatutunayan sa buong mundo na merong ibubuga ang lahi ni Juan Dela Cruz. Narito ang kasalukuyang posisyon ng ating mga nominado.

8. Tubbatah Reef ng Palawan

9. Chocolate Hills ng Bohol

39. Underground River ng Palawan

Para po sa completong listahan ng pinaka-huling talaan ng mga nomindo, paki-sundan lang po ang link na 'to: http://www.new7wonders.com/nature/en/liveranking/

Boto lang tayo.. at ipagmalaki ang sariling atin!!!!

Mabuhay ang Pilipinas!

Araw ng Paggagawa

Tuwi nalang sasapit ang unang araw ng buwan ng Mayo ay hinding-hindi malilimutan nating mga Pinoy kung ano ang meron sa araw na ito. Diba kulay pula nga ito sa ating mga tala-arawan (kalendaryo).

Kung nabanggit ang "a-uno ng Mayo", kung hindi man lahat ay madalas sumasagi ang mga larawan sa ating isipan tuwing Mayo a-uno. Mga malawakang pagtitipon ng iba't-ibang unyon. Pagma-martsa mula sa Mabuhay Rotonda hanggang sa panulukan ng Legarda at Mediola. Ang walang kamatayang sigaw ng mga manggagawa ng umento sa sahod. Kung sino-sinong kilalang personalidad, poliko at lider ng unyon na nakatayo at matatas na nagsasalita sa ibabaw ng entablado sa paanan ng tulay ni Chino Roces.

Araw ito para sa mga dakilang manggagawa.

Subalit saan ba ito nagsimula? Pa'no ba ito nag-umpisa?

Sabi ng Wikipedia, ang Araw ng Paggawa o ang Labor Day ay isang pambansang kapisatahan ng Amerika. Iba sa nakagawian nating mga Pinoy, ito ay ipinagdiriwang tuwing unang Lunes sa buwan ng Setyembre. Ito ay nag-umpisa noong taong 1882, sa kagustuhan ng Central Labor Union ng Amerika na gumawa ng isang araw ng pamamahinga para sa mga "manggagawa". Ito ay naging isang Pista-Opisyal base na rin sa itinakda ng Act of Congress noong 1894.

Sa Wikipedia pa rin, sa ibang bansa ang Araw ng Paggawa o ang Labor Day ay tinatawag ring May Day, at gaya nga ng nakamulatan nating mga Pinoy, ito ay ipinagdiriwang tuwing unang araw ng Mayo. Sa maraming bansa, ito ay itinuturing na Pista-opisyal. Ang pambansang pagkilala at pagdiriwang para bigyang pugay ang mga naiambag na tulong nga mga manggagawa sa paglago ng ekonomiya ng isang bansa.

Sa mga unang tala kung saan ito nagmula, sinasabing ang unang pagdiriwang nito ay naganap noong hindi pa man naaabot ng Kristiyanismo ang Europa. Noong mga panahong iyon kung saan ay halos lahat ay pagano, maraming pista ang ipinagbawal dahil sa unti-unting pagkalat ng Kristiyanismo sa Europa. Kalimitang kinapapaloobang ang pagdiriwang ng masaya at walang humpay na sayawang tinatawag ng "Maypole" at ang pagpuputong ng korona para sa mapipiling Reyna ng Mayo.

Sa Romano Katoliko, ipinagdiriwang ang Mayo bilang buwan ng Birheng Maria. Sa ganitong paniniwala, ang May Day ay ang umpisa ng isang buwang pagdiriwang para sa Birheng Maria. Sa Mindoro ang tawag namin ay Flores de Mayo, kung saan sa loob ng isang buwan ay gabi-gabi ang pag-aalay ng bulalak sa Birheng Maria.

Ang May Day / Labor Day ay inaari rin bilang pandaigdigang araw ng paggawa. Ito rin ay upang alalahanin ang araw kung saan ay ipinaglaban ni Robert Owen ng Britanya ng tinatawag na "Eight Hour Day", o ang pagta-trabaho ng isang manggagawa sa loob ng walong oras sa isang araw.

Bakit May 01?

Napili ang petsang ito bilang pag-alala na rin sa mga tao sa likod ng Second International, kung saan ang kanilang determinasyong isulong ang karapatan at kagalingan ng mga manggagawa ng Haymarket sa Chicago Illonois, noong 1886, ay hindi lamang hinangaan, kundi naging inspirasyon din ng lahat ng manggagawa sa buong mundo.

Bagaman ito ay isang pandaigdigang pagdiriwang, hindi lahat ng bansa ay nagdiriwang, tulad na lamang ng mga konserbatibong bansa ng Kuwait o dito sa Saudi Arabia.

Sa kabilang banda, kahit na ang Amerika ang naging insperasyon upang mabuo ang May Day / Labor Day, itinalaga ng Mababang Kapulungan ng Amerika ang Mayo a-uno bilang Araw ng Katapatan (Loyalta Day) noong 1958.

'Yon lang... maraming salamat sa Google (tumulong sa paghahanap) at sa Wikipedia (para sa hindi matatawarang inpormasyon).

At sa mga manggagawa (paulit-ulit na 'to)...araw nyo 'to.

MALIGAYANG ARAW NG PAGGAWA!!!

Babalik Ka Rin

Araw ng Paggawa.

Sa lahat ng mga Manggagawang Pinoy, ang munti kong pahina ay nagbibigay pugay sa inyo!!!

Sa lahat ng mga Manggagawang Pinoy na Nangingibang-bansa, ako rin ay nagpupugay sa inyo... Saludo ako sa inyong tapang at lakas ng loob na batahin ang kalungkutan para sa mga mahal ninyo sa buhay. Sumasaludo ako sa inyong talinong patuloy na ipinamamalas sa lupain ng mga banyaga.

At alam ko, pagdating ng panahon.... babalik ka rin.

Babalik Ka Rin

Gary Valenciano

Saan ka man naroroon ngayon, Saudi, Japan o HongKong

Babalik ka rin, babalik ka rin, babalik ka rin.

Ano mang layo ang narating, Singapore, Australia

Europe o Amerika, babalik at babalik ka rin.

Kaytagal mo nang nawala, babalik ka rin, babalik ka rin
Kaytagal mo nang nawala, babalik ka rin, babalik ka rin.

Sa piling ng iyong pinagmulan, sa iyong nakaraan
Babalik ka rin, babalik ka rin, babalik ka rin
Anumang layo ang narating, iyong maaalala
Ang dati mong kasama, babalik at babalik ka rin.

Sa paglipas ng panahon, sa iyong kahapon
Sa alaalang naghihintay sa ‘yo.

Maghihintay kami sa 'yong pagbabalik!!!

Disclaimer: Maraming salamat kay Gary V. na umawit ng napagandang awiting ito, sa mga taong nasa likod ng himig at titik ng awit na ito, salamat. Salamat rin sa anton.blogs.com at sa balitangmarino.com para sa mga larawang ginamit sa blog entry na 'to.